Nas primeiras semanas realizamos unhas actividades cun libro que ten por título: El gran libro de los superpoderes, de Susana Isern e con ilustracións de Rocío Bonilla, da editorial Flamboyant.
Todas e todos temos un talento que nos fai únicas e únicos, e á súa vez, especiais. A algunhas dáselles ben as matemáticas e a outros a cociña. Unhas son aventureiras e outros prefiren ler. Descubrimos que nos diferencia dos demais, nin mellor nin peor. Cal é o noso talento?
Unha colección de contos ilustrada que nos fixo reflexionar sobre a identidade, as súas virtudes e capacidades.
Este álbum non nos conta unha historia única, se non que nos presenta un a un a 18 protagonistas (nenas e nenos), descríbenos a súa forma de ser, as súas características e habilidades máis especiais e acaba desvelándonos cal é o seu don especial, o seu superpoder. Pero como unha imaxe vale máis que mil palabras, aquí tedes uns fragmentos do libro.
Ao escoitar estas historias, fixemos un exercicio de introspección, ver se nos sentimos reflexadas e reflexados nalgunhas destas características e identificar cal é o noso superpoder (ou superpoderes!).
Fixemos as seguintes actividades:
- Nun primeiro lugar, ao mesmo tempo que iamos lendo as historias, tiñamos que marcar aqueles que ían saíndo.
- A continuación tiñamos que reflexionar se tiñamos algún outro superpoder que non se nomeara no libro.
- E por último, eliximos o superpoder favorito de cada unha e cada un, e debuxámolo.
Trátase dun libro precioso e moi útil para traballar o autocoñecemento nas crianzas, focalizándose nos seus puntos fortes e valorando a diversidade. Na escola, en xeral, maniféstanse máis certas calidades académicas, pero as pequenas e pequenos teñen os seus talentos e destacan nalgo, polo que penso que é preciso evidencialo e poñelo ao mesmo nivel, sen que pareza que unhas virtudes ou calidades son máis importantes que outras.
